كل سنة وأنا طيبة

يوم ميلادي كان من كام يوم - كتبت عيد ميلادي وبعدين مسحتها - لأن مش شرط يكون عيد او مش عارفه ليه إسمه عيد...ده يوم عمرنا نقص فيه سنه ...يوم بيفكرنا ان عدى كتير ومش فاضل غير القليل ...يوم بييفكرنا في تقصيرنا السنين اللي فاتت ...
عامة انا اليوم ده كان بيفكرني بسنه من السنوات الغريبه في حياتي ...
سنه حصل فيها تغيرات كتير في مفهومي لحاجات كتير ...
سنه قابلت فيها ناس كتير بشخصيات مختلفة....متناقضة...وساعات غامضه ......
سنة اتعلمت فيها خبرات كويسه من مشاكل وقعت فيها..... وحسيت أوي السنه دي بمدى الخبره اللي بتديها السنين من مواجهات الحياه واللي بيكتسبها الشخص من غير مذاكره او دراسه .....وبقيت اركز أوي في الأشخاص لما بتكون خبرتهم هي اللي بتتكلم مش هما .....
سنة أول مرة أشعرفيها أن إختلاف العلماء عذاب....تشتيت ....لم يكن رحمة أبدا .....مكنتش عايزه أقول كده لأني وعلى حد علمي القليل أعتقد أنه حديث للنبي صلى الله عليه وسلم ....وبسرعة أجده حديث موضوع مكذوب ....مش غريب على ديننا الذي يدعو دائما للوحده -
مع كل التخبطات دي في الحياة اتختمت السنة بأحاى حاجه وأحلى إحساس ممكن أحسه هو وصول تيم الله ابن أختي مولود جديد في العيله ...وإحساس وجوده معانا نساني كل الحاجات اللي كانت مضايقاني الأسبوعين اللي فاتو
ربنا مايحرمناش منك يا تيمو يا حبيب قلب خالتو عشان فعلا انت كنت أحلى حاجه حصلت السنه دي
وبرضه كل سنة وأنا طيبه ....وكل سنه وانا محققه كل اللي بتمناه....وكل سنه وانا أكثر قربا من الله